Mwanaharakati nchini Uganda, Dkt. Stella Nyanzi ambaye alikamatwa baada ya kumuita Rais Yoweri Museveni jozi ya makalio amepewa dhamana.

Mwanaharakati huyo alizirai alipojaribu kusimama baada ya kikao cha mahakama kuahirishwa kwa muda.

Upande wa mashtaka ulikuwa umesema iwapo Dkt Nyanzi angepewa dhamana, basi mahakama iweke sharti kuwa achunguzwe afya yake ya kiakili.

Kadhalika, walitaka azuiwe kuandika au kuzungumzia chochote kuhusu Rais, serikali au familia ya Rais.

Mawakili wake hata hivyo walisema anafaa kupewa dhamana kutokana na hali yake ya afya na kwamba anafaa kuruhusiwa kupata nyaraka muhimu kuhusu kesi yake ili kujiandaa kujitetea.

Hakimu aliamua Dkt Nyanzi hafai kujihusisha katika shughuli zozote ambazo zinaweza kuingilia kesi hiyo dhidi yake.

Dkt Nyanzi alikamatwa mwezi Machi baada ya kuandika msururu wa ujumbe kwenye Facebook, ambapo alimshutumu rais Museveni kwa kushindaa kuwapa wasichana kutoka familia maskini vitambaa vya kutumia wakati wa hedhi.

Wasichana wengi nchini Uganda wameripotiwa kuacha masomo kutokana na aibu ya kukosa sodo.

 

Leave a Reply

Your email address will not be published. Required fields are marked *